នៅគ្រឹះសករាជ១៦០២ ក្រុមហ៊ុនរបស់ហូឡង់ដ៏ល្បី East Indian Company បានមកបោះទីតាំងនៅប៉ាតាណី នគរសៀម។ Jeremias van Vliet ជាភ្នាក់ងាររបស់ក្រុមហ៊ុននេះនៅចន្លោះឆ្នាំ១៦២៤ដល់ឆ្នាំ១៦២៩ ត្រូវបានតែងតាំងឱយទទួលបន្ទុកលើកិច្ចការទាំងឡាយដែលបំរើប្រយោជន៍ដល់ក្រុមហ៊ុននៅនគរសៀម។ van Vliet មានឱកាសល្អជាច្រើនដើម្បីប្រាស្រ័យទាក់ទងក្នុងកិច្ចការជំនួញ សង្គម និងលក្ខណ្ឌជីវិតរបស់មនុស្សម្នានៅសម័យនោះ។ ដោយសារគាត់ជាអ្នកសង្កេតដ៏ប្រុងយ័ត្ន និងជាអ្នកស៊ើបអង្កេតដ៏វៃឆ្លាតម្នាក់ផងដែរ ធ្វើឱយគាត់មានឱកាសល្អជាច្រើនក្នុងការប្រាស្រ័យទាក់ទងនឹងកិច្ចការខាងលើ។ យ៉ាងណាក៏ដោយ សៀវភៅរបស់គាត់មិនបានយកទៅបោះពុម្ពផ្សាយជាសាធារណៈទេកាលគាត់នៅរស់។ ក្នុងសេចក្តីពិពណ៌នារបស់គាត់ van Vliet បានសរសេររៀបរាប់ពីការលើកទ័ពមកឈ្លានពាននគរខ្មែររបស់សៀម ក្នុងរាជព្រះបាទជ័យជេដ្ឋាទី២។ ព្រះបាទជ័យជេដ្ឋាទី២ បានឡើងគ្រងរាជ្យបន្តពីព្រះបិតាព្រអង្គ ព្រះបាទស្រីសុរិយោពណ៌ ។ ព្រះអង្គព្យាយាមលប់បំបាត់ឥទ្ធិពលសៀមនៅលើនគរខ្មែរដែលបន្សល់ទុកពីព្រះបិតាព្រះអង្គ។ ទ្រង់ជាមហាក្សត្រមួយអង្គដែលអ្នកប្រវត្តិសាស្ត្រលើ Facebook អ្នកស្នេហាជាតិជ្រល់ៗជាច្រើនត្មិះដៀលថាជាមហាក្សត្រល្ងង់ មិនខ្វល់ពីប្រទេសជាតិ។ ខាងក្រោមនេះជាសេចក្តីប្រែផ្លូវការនៃសង្គ្រាមខ្មែរសៀមក្នុងសៀវភៅរបស់ជនជាតិហូឡង់រូបនេះ។
មហាក្សត្រកម្ពុជានានា តាំងពីបុរាណកាលមក ជាស្តេចដែលចំណុះឱយមហាក្សត្រសៀម តែម្តងម្កាល ពួកគេងើបបះបោរ។ បើទុកណាជាមហាក្សត្រ ព្រះអង្គម្ចាស់សៀមជាច្រើនអង្គបានវាយបង្ក្រាបឱយស្តេចក្រាញ់ទាំងនោះឱយគោរព ដោយប្រើកំលាំងទ័ពជាច្រើនដង ក៏មហាក្សត្រកម្ពុជាទាំងនោះមិនទ្រាំនៅចំណុះយ៉ាងខ្ជាប់ខ្ជួនដែរ។ ពួកគេតែងត្រៀមខ្លួនធ្វើសង្គ្រាមជានិច្ច ហើយបង្កររឿង ឆក់ប្លន់នៅក្រុងនានាតាមទន្លេឬស្ទឹងរបស់សៀម។ ដើម្បីការពារកុំឱយរឿងបែបនេះកើតឡើងម្តងទៀត និងដើម្បីចងកម្ពុជាឱយជាប់នឹងអំណាចរបស់នគរសៀម មហាក្សត្រសៀមមុន (ណរេសួន? បិតាមហាក្សត្រកាលនោះ) បានដឹកនាំកងទ័ពទៅកម្ពុជាដោយផ្ទាល់ព្រះអង្គ នៅឆ្នាំ១៦២២។ កងទ័ពទាំងនោះ មួយផ្នែកបញ្ជូនតាមជើងគោក និងមួយផ្នែកទៀតទៅតាមជើងទឹក។ កងទ័ពជើងទឹកមានច្រើនកងពល (Galleries) និងទូកមិនចាំបាច់ជាច្រើនទៀត។
ដកស្រង់ពី៖ Jeremias van Vliet’s Description of the Kingdom of Siam by F. VAN RAVENSWAAY. ទាញចេញពី The Siam Society
ទិវាករ 